“Энди менинг уйим йўқ” — Жанубий Корея президенти
Ли Чже Мён кўчмас мулк бозорини қўллаб-қувватлаш мақсадида ягона уйини сотиб, энди шахсий уй-жойи йўқлигини билдирди.
Жанубий Корея президенти Ли Чже Мён ўзига тегишли ягона квартирани сотганини ва энди шахсий уй-жойи йўқлигини маълум қилди. Бу ҳақда у ҳукуматнинг уй-жой сиёсатига бағишланган йиғилишда баёнот берди.
Yonhap хабарига кўра, президент ушбу квартирани жорий йилнинг февраль ойида сотувга қўйган. Кўчмас мулк Сеул яқинидаги Сеонгнам шаҳрида жойлашган бўлиб, битим ҳукуматнинг уй-жой бозорини барқарорлаштириш сиёсати доирасида амалга оширилган.
Президент администрацияси дастлабки олди-сотди шартномаси имзоланганини тасдиқлаган. Ли Чже Мён ва унинг турмуш ўртоғи Ким Хе Гёнг мазкур квартирага биргаликда эгалик қилган. Ҳозирда улар Сеулнинг Ханнам-донг туманидаги расмий президент қароргоҳида истиқомат қилмоқда.
Жанубий Корея ҳукумати кўчмас мулк бозоридаги спекуляцияларни камайтириш ҳамда уй-жой нархларини барқарорлаштириш мақсадида фойдаланилмаётган турар жойларни сотишни рағбатлантирмоқда. Расмийлар бундай чоралар мавжуд уй-жой фондини кўпайтириш ва нархларнинг сунъий ошишининг олдини олишга хизмат қилишини таъкидламоқда.
