Эроннинг собиқ президенти Моссад билан алоқалари учун ҳибсга олинди — NYT
Маҳмуд Аҳмадинежоднинг идораси эса барча айбловларни инкор этди.
The New York Times нашри Эроннинг собиқ президенти Маҳмуд Аҳмадинежод Исроилнинг Моссад разведка хизмати билан алоқаларда бўлгани гумони билан Эрон Ислом инқилоби қўриқчилари корпуси (IRGC) томонидан уй қамоғига олингани ҳақида мақола эълон қилди.
Нашрнинг АҚШ, Исроил ва Эрон расмий доираларидаги аноним манбаларга таяниб ёзишича, Моссад бир неча йил давомида Аҳмадинежодни ўз томонига оғдиришга уринган ҳамда Эронда ҳокимият алмашган тақдирда уни мамлакатнинг янги раҳбарларидан бири сифатида кўрган.
Терговда айтилишича, ушбу махфий операция доирасида Аҳмадинежод хорижда Моссад вакиллари билан бир неча бор учрашган. Хусусан, Будапештда ўша пайтдаги Моссад раҳбари Давид Барнеа билан учрашув ўтказилгани, Исроил томони унинг сафарлари ва яшаши билан боғлиқ харажатларни молиялаштиргани даъво қилинган.
Мақолада яна февраль ойида Теҳронда собиқ президент қароргоҳига берилган зарбалардан сўнг Аҳмадинежод Моссад томонидан хавфсиз жойга олиб чиқилгани, бироқ кейинчалик номаълум сабаблар билан у ерни тарк этгани ва шундан сўнг IRGC томонидан уй қамоғига олингани иддао қилинади.
Бироқ Маҳмуд Аҳмадинежоднинг идораси ушбу маълумотларнинг барчасини кескин рад этди. Расмий баёнотда The New York Times'нинг хабари "мутлақо ёлғон", "тўқиб чиқарилган" ва "жамоатчиликни чалғитишга қаратилган" деб баҳоланди. Шунингдек, собиқ президент уй қамоғида экани ҳақидаги хабар ҳам инкор этилди.
Ҳозирча Эрон ҳукумати Аҳмадинежоднинг ҳибсга олингани ёки уй қамоғига жойлаштирилгани юзасидан расмий тасдиқ бермаган. Шу сабабли NYT келтирган маълумотлар мустақил манбалар томонидан тўлиқ тасдиқланмаган.
