Иш ҳақи кечиктирилса, ходимга компенсация тўланади
Бу меҳнат муносабатларини соддалаштириш, уларни рақамлаштириш ва ходимлар ҳуқуқларини кучайтиришни назарда тутувчи қонун лойиҳасида белгиланди.
Олий Мажлис Қонунчилик палатаси депутатлари меҳнат муносабатларини такомиллаштиришга қаратилган қонун лойиҳасини қабул қилиб, Сенатга юборди. Ҳужжат меҳнат муносабатларини расмийлаштиришни соддалаштириш, ортиқча бюрократик тўсиқларни камайтириш ҳамда ходимларнинг ҳуқуқларини кучайтиришни назарда тутади.
Қонун лойиҳасига кўра, ишга қабул қилишда талаб этиладиган ҳужжатлар рўйхати қисқартирилади. Эндиликда фуқарони ишга қабул қилишда асосан унинг шахсий идентификация рақами (ЖШШИР) талаб этилади. Ҳарбий хизматга мажбурлар ва чақирилувчилар эса ҳарбий гувоҳнома ёки ҳарбий ҳисобда турганлик ҳақидаги ҳужжатни тақдим этади.
Шунингдек, меҳнат муносабатларини рақамлаштириш доирасида электрон рақамли имзо ёки биометрик идентификация (Фасе ИД) орқали тасдиқланган ҳужжатлар юридик кучи жиҳатидан қўлда имзоланган ҳужжатларга тенглаштирилади.
Лойиҳада меҳнат жараёнида тазйиқ ва зўравонликка қарши курашишга оид нормалар ҳам белгиланган. Унга кўра, бундай ҳолатларнинг олдини олиш, уларни тақиқлаш ҳамда жабрланган ходимларни ҳимоя қилиш чоралари мустаҳкамланмоқда.
Бундан ташқари, иш берувчи иш ҳақини белгиланган муддатда тўламаган тақдирда, ҳар бир кечиктирилган кун учун ходимга пулли компенсация тўлаш тартиби аниқлаштирилмоқда.
Қонун лойиҳаси депутатлар томонидан қабул қилиниб, кўриб чиқиш учун Сенатга юборилди.
