Мустақил изланувчиликка қабул: PhD вa DSc учун қабул бошланди
PhD ва DSc учун ҳужжат топширувчиларга илмий мақолалар, тезислар ҳамда суҳбатдан ўтиш талаблари белгиланган.
15 июлдан олий таълимдан кейинги таълимнинг мустақил изланувчилик шаклига ҳужжатлар қабули бошланди.
Инновацион ривожланиш агентлиги маълум қилишича, талабгорлар фалсафа доктори (PhD) ва фан доктори (DSc) илмий даражаларини олиш учун белгиланган тартибда ҳужжат топширишлари мумкин.
Мустақил изланувчилик ишлаб чиқаришдан ажралмаган ҳолда илмий фаолият олиб бориш ҳамда илмий даража олиш имконини берувчи олий таълимдан кейинги таълим шакли ҳисобланади.
PhD илмий даражасига даъвогарлар магистр дипломига эга бўлиши, камида битта илмий мақола ва тегишли йўналиш бўйича камида иккита илмий тезис эълон қилган бўлиши ҳамда суҳбатдан муваффақиятли ўтиши лозим.
DSc илмий даражасига ҳужжат топширувчилар эса PhD ёки унга тенглаштирилган илмий даражага эга бўлиши, илмий даражани олганидан сўнг камида учта илмий мақола ва камида иккита илмий тезис чоп эттирган бўлиши, суҳбатдан ўтиши ҳамда докторлик диссертацияси режасининг батафсил лойиҳасини тақдим этиши талаб этилади.
Қабул жараёни рақамли платформалар орқали амалга оширилади. Айрим ҳужжатлар my.gov.uz тизими орқали автоматик шакллантирилади, қолган зарур ҳужжатлар эса daraja.ilmiy.uz платформасига электрон шаклда юкланади.
Мутахассислар илмий фаолиятни давом эттиришни режалаштираётган талабгорларга ҳужжатларни белгиланган муддатларда топшириш ва қабул талаблари билан олдиндан батафсил танишиб чиқишни тавсия этмоқда.
