Наманганда ноқонуний қурилмалар бузиб ташланмоқда
Хусусан, Янги Наманган туманида 7 нафар фуқаронинг тегишли рухсатномасиз қурилган қурилмаси МИБ томонидан бузилди.
Янги Наманган туманида суд қарорининг ижросини таъминлаш мақсадида Мажбурий ижро бюроси томонидан қонунчилик талаблари асосида мажбурий ижро ҳаракатлари амалга оширилмоқда.
Хусусан, Янги Наманган тумани "Мустақилликнинг 5 йиллиги" маҳалласи ҳудудида масъулияти чекланган жамиятга тегишли ер майдонида 7 нафар фуқаро томонидан тегишли рухсатномаларсиз уй-жойлар қурилганлиги юзасидан судга даъво аризаси киритилган.
Фуқаролик ишлари бўйича суд томонидан иш атрофлича кўриб чиқилиб, ноқонуний қурилмаларни буздириш ҳақида қарор қабул қилинган. Ушбу суд ҳужжати қонуний кучга киргач, ижро ҳужжатлари Мажбурий ижро бюроси Янги Наманган туман бўлимига юборилган.
Ижро иши қўзғатилганидан сўнг қарздорларга суд қарорини ихтиёрий равишда белгиланган муддатда бажариш учун имконият яратилган.
Бироқ ихтиёрий ижро муддати давомида суд қарорининг талаблари бажарилмаганлиги сабабли давлат ижрочилари томонидан қонунчиликда белгиланган тартибда мажбурий ижро ҳаракатларига киришилган.
Бугунги кунда олиб борилаётган ижро тадбирлари давомида суд қарорининг ижросини таъминлаш мақсадида ноқонуний қурилмаларни буздириш ишлари амалга оширилмоқда.
