Нетаняхунинг АҚШга бориши кутилмоқда
Ташриф давомида Доналд Трамп билан учрашув ўтказилиши эҳтимоли ҳам кўриб чиқилмоқда.
Исроил бош вазири Бенямин Нетаняху 18 июль куни АҚШга ташриф буюриши кутилмоқда. Бу ҳақда Reuters агентлиги Исроилдаги юқори лавозимли манбага таяниб хабар берди.
Қайд этилишича, Нетаняхунинг АҚШга сафари 18 июль санасига режалаштирилган. Бироқ мазкур ташриф юзасидан Исроил ёки АҚШ расмийлари томонидан ҳозирча расмий тасдиқ берилмаган.
Шунингдек, Ynet нашри ҳам ушбу маълумотни тасдиқлаб, Нетаняху АҚШ президенти Доналд Трамп билан учрашиши мумкинлигини ёзган. Нашрга кўра, ташрифнинг асосий сабаби сифатида АҚШ сенатори Линдси Гремнинг дафн маросимида иштирок этиш кўрсатилмоқда.
Бироқ Ynet'нинг кейинги хабарида таъкидланишича, Нетаняху ва Трамп ўртасидаги учрашув ҳозирча расман режалаштирилмаган, аммо у сафар давомида ёки келаси ҳафта бошида ўтказилиши эҳтимоли мавжуд.
Эслатиб ўтамиз, июнь ойида Эрон масаласи бўйича қарашлар сабаб Доналд Трамп ва Бенямин Нетаняху ўртасида айрим келишмовчиликлар юзага келгани ҳақида хабарлар тарқалган эди. Кейинчалик Эрон атрофидаги вазият кескинлашганидан сўнг, АҚШ маъмурияти Исроилдан можаронинг янада кенгайишига йўл қўймасликни сўрагани ҳам маълум қилинган.
