Сирдарёда МИБ орқали қидирувдаги машина топилди
Фуқаро банкдан кредит олишда уни гаровга қўйган ва кейинчалик уни яширган.
Қарздор фуқародан АТБ «Капиталбанк» фойдасига 72 миллион сўм миқдоридаги кредит қарздорлигини ундириш тўғрисидаги суд қарори ижроси Мажбурий ижро бюросининг Сирдарё вилояти бошқармаси томонидан таъминланмоқда.
Ижро ҳаракатлари давомида қарздор томонидан гаров мулки ҳисобланган «Nexia» русумли автомашина яширилганлиги аниқланиб, унга нисбатан қидирув эълон қилинди.
Олиб борилган қидирув тадбирлари натижасида мазкур автомашина аниқланиб, белгиланган тартибда жарима майдонига жойлаштирилди.
Айни вақтда автомашинани аукцион савдосига чиқариш ҳамда тушган маблағлар ҳисобидан суд қарори ижросини таъминлаш чоралари кўрилмоқда.
