Тошкентда қарийб 3,2 килограмм гиёҳвандлик воситалари мусодара қилинди
Тезкор тадбирлар давомида героин, гашиш, опий ва мефедрон мусодара қилиниб, бир неча шахс қўлга олинган.
Тошкент шаҳрида қарийб 3,2 килограмм гиёҳвандлик воситалари ноқонуний муомаладан чиқарилди. Бу ҳақда Давлат хавфсизлик хизмати хабар берди.
Маълум қилинишича, Бектемир туманида ҳаракатланаётган «Gentra» русумли автомобиль тўхтатилиб текширилган. Унда Яшнобод туманида яшовчи, 1998 йилда туғилган икки нафар фуқаро кетаётгани аниқланган. Автомобиль салонидан бир нечта зип-пакетларга қадоқланган кукунсимон моддалар топилган.
Тезкор тадбир давом эттирилиб, гумонланувчилар яшириб қўйган хуфия жой ҳамда ижарага олинган хонадон кўздан кечирилган. У ердан ҳам кукунсимон моддалар, электрон тарозилар ва гиёҳвандлик воситаларини қадоқлашда фойдаланилган буюмлар аниқланган.
Экспертиза хулосасига кўра, мусодара қилинган моддалар 1,2 килограмм героин ва 100 грамм мефедрон экани тасдиқланган. Аниқланишича, ушбу икки фуқаро аввал ҳам гиёҳвандлик воситалари билан боғлиқ жиноятлар учун судланган.
Иккинчи ҳолатда эса Шайхонтоҳур туманида яшовчи, 1982 йилда туғилган, муқаддам судланган фуқаронинг хонадонидан 47 грамм гашиш ва 34 грамм опий топилган.
Тезкор тадбир давомида уни гиёҳвандлик воситалари билан таъминлаб келган Олмазор туманида яшовчи 1980 ва 1985 йилларда туғилган икки нафар фуқаро ҳам қўлга олинган. Уларнинг автомобиллари ва яшаш манзиллари кўздан кечирилганда 1,8 килограмм гашиш ҳамда 12 грамм опий мусодара қилинган.
Ҳозирда ҳар икки ҳолат юзасидан гумонланувчиларга нисбатан жиноят ишлари қўзғатилиб, тергов ҳаракатлари олиб борилмоқда.
