Тошкентда қарздор МЧЖнинг 4 та машинаси хатланди
Маълум бўлишича, корхонанинг 4,9 миллиард сўмлик қарздорлиги мавжуд бўлиб, уни ихтиёрий муддатда бартараф этмаган.
Мажбурий ижро бюросининг Юнусобод туман бўлими иш юритувида Фуқаролик ишлари бўйича судлар томонидан берилган ижро ҳужжатларига асосан қарздор МЧЖдан бир нечта ундирувчилар фойдасига жами 4 915 324 674,98 сўм қарздорликни ундириш билан боғлиқ ижро ишлари юритилмоқда.
Ижро ҳужжатлари қонунчиликда белгиланган тартибда ижрога қабул қилиниб, қарздорга қарздорликни ихтиёрий равишда қоплаш учун 15 кунлик муддат берилган. Бироқ белгиланган муддатда суд қарорлари ихтиёрий тартибда бажарилмаган.
Мажбурий ижро ҳаракатларига киришилиб, Қонуннинг 21-моддаси талабларига асосан қарздор корхонанинг банк ҳисоб рақамлари, автотранспорт воситалари ва кўчмас мулкларига нисбатан тақиқ чоралари ўрнатилган.
Олиб борилган мажбурий ижро ҳаракатлари давомида 2026 йил 3 июль куни холислар иштирокида қарздорга тегишли бўлган «GAZ 330232-244» ҳамда «Nexia» русумли транспорт воситалари қаторида жами 4 та автотранспорт воситаси белгиланган тартибда хатланди.
Айни пайтда хатланган мол-мулкларни қонунчилик талабларига мувофиқ баҳолаш ва электрон онлайн-аукцион орқали реализация қилиш орқали ундирувчиларнинг қонуний манфаатларини таъминлаш чоралари кўрилмоқда.
