Тошкентда МИБ ходимнинг 255 млн иш ҳақини ундириб берди
Қарздор корхона ихтиёрий муддатда суд қарори талабларини бажармагач, унга нисбатан мажбурий ижро чоралари қўлланилган.
Мажбурий ижро бюросининг Чилонзор туман бўлими иш юритувида фуқаролик ишлари бўйича Учтепа туманлараро судининг ижро варақасига асосан қарздор масъулияти чекланган жамиятдан ундирувчи фойдасига 255 170 048 сўм иш ҳақини ундириш тўғрисидаги ижро ҳужжати мавжуд бўлган.
Мазкур ижро ҳужжати юзасидан давлат ижрочиси томонидан Ўзбекистон Республикасининг «Суд ҳужжатлари ва бошқа органлар ҳужжатларини ижро этиш тўғрисида»ги Қонунининг 23-моддасига мувофиқ ижро иши юритиш қўзғатилиб, қарздор ташкилотга ихтиёрий муддатда қарор талабларини бажариш юзасидан огоҳлантириш юборилган.
Қарздор ташкилот томонидан қонун талаблари белгиланган муддатда бажарилмаганлиги сабабли, давлат ижрочилари томонидан унга нисбатан қонунчиликда назарда тутилган барча мажбурий ижро чоралари қўлланилган.
Кўрилган чоралар натижасида қарздор ташкилотдан 255 170 048 сўм миқдоридаги иш ҳақи тўлиқ ундирилиб, собиқ ходим фойдасига ўтказиб берилди.
