Ўзбекистон АИ-95 бензини нархи бўйича Марказий Осиёда биринчи ўринда
Бироқ унинг нархи ҳали ҳам жаҳон ўртача кўрсаткичидан 8,7 фоиз паст.
Ўзбекистонда АИ-95 маркали бензин нархи Марказий Осиё давлатлари орасида энг юқори кўрсаткични қайд этди.
Ranking.kz нашри GlobalPetrolPrices платформасининг 2026 йил 6 июль ҳолатига оид маълумотларига таяниб хабар беришича, Ўзбекистонда АИ-95 бензинининг бир литри 1,342 АҚШ долларини ташкил этмоқда. Бу Марказий Осиё мамлакатлари орасидаги энг юқори нарх ҳисобланади.
Таққослаш учун, АИ-95 бензинининг бир литри:
-
Қирғизистонда — 1,016 доллар,
-
Қозоғистонда — 0,687 доллар,
-
Туркманистонда — 0,428 долларни ташкил этади.
Шунингдек, мазкур ёқилғи нархи Россияда 0,943 доллар, АҚШда 1,094 доллар, Хитойда эса 1,136 доллар этиб қайд этилган.
Шу билан бирга, Ўзбекистонда АИ-95 бензини минтақадаги энг қиммат бўлишига қарамай, унинг нархи жаҳон ўртача кўрсаткичидан 8,7 фоиз паст. Ҳозирда дунё бўйича АИ-95 бензинининг ўртача нархи 1,47 АҚШ долларини ташкил этади.
Тадқиқотга кўра, дунёда энг арзон АИ-95 бензини Ливия (0,023 доллар/литр), Эрон (0,029 доллар/литр) ва Венесуэлада (0,035 доллар/литр) сотилмоқда.
Энг қиммат АИ-95 бензини эса Гонконгда қайд этилган бўлиб, у ерда бир литр ёқилғи 4,06 АҚШ долларидан сотилмоқда. Шунингдек, Малави, Дания, Исроил, Нидерландия ва Финляндия ҳам бензин нархи энг юқори бўлган давлатлар қаторидан жой олган.
