Жазирама сабаб Қашқадарёда ҳам юк машиналари ҳаракати чекланади
Чеклов автомобиль йўллари қопламасини сақлаш ва уларнинг муддатидан олдин шикастланишининг олдини олиш мақсадида жорий этилди.
Қашқадарё вилоятида жазирама об-ҳаво сабаб оғир юк автомобиллари ҳаракатига вақтинчалик чеклов жорий этилди.
Вилоят ҳокимлигининг маълум қилишича, ҳаво ҳарорати кундузи 42–44°С, айрим ҳудудларда эса ундан ҳам юқори даражага кўтарилмоқда. Бундай шароитда асфальтбетон қопламаси ҳарорати 70–75°С гача етиб, йўлларнинг юк кўтариш қобилияти пасаяди. Натижада оғир юк транспорти ҳаракати йўл қопламасида деформациялар ва бошқа техник нуқсонларни келтириб чиқариши мумкин.
Шу муносабат билан Қарши шаҳри, туман марказлари ҳамда уларни боғловчи умумий фойдаланишдаги автомобиль йўлларида оғир юк автомобилларининг ҳаракати ҳар куни соат 09:00 дан 19:00 гача вақтинча чекланади.
Масъуллар ҳайдовчилар ҳамда юк ташувчи корхоналардан мазкур чекловларга қатъий амал қилишни ва юк ташиш вақтларини белгиланган тартиб асосида режалаштиришни сўради.
Қайд этилишича, ушбу чора йўл инфратузилмасини асраш, ҳаракат хавфсизлигини таъминлаш ҳамда автомобиль йўлларининг хизмат муддатини узайтиришга хизмат қилади.
