Эндиликда фуқаролар ўз номига расмийлаштирилган банк карталари ва телефон рақамларини онлайн бошқара олади
My.gov.uz порталида банк карталарини блоклаш, фойдаланилмаётган SIМ-карталарни ўчириш ва пуллик хизматларни текшириш имконияти яратилади.
Ўзбекистонда 2026 йил 1 октябрдан Ягона интерактив давлат хизматлари портали — my.gov.uz орқали кўрсатиладиган хизматлар сони кенгайтирилади. Бу ҳақда Адлия вазирлиги хабар берди.
Қабул қилинган қарорга мувофиқ, фуқаролар ва юридик шахслар портал орқали ўз номига расмийлаштирилган телефон рақамлари ва банк карталари ҳақида маълумот олиш, шунингдек уларни бошқариш имкониятига эга бўлади.
Янги хизматлар доирасида фуқаролар:
-
ўз номига расмийлаштирилган ва фойдаланилаётган телефон рақамлари ҳамда банк карталари тўғрисида маълумот олиши;
-
телефон рақамини маълум муддатга вақтинча нофаол ҳолатга ўтказиш ёки қайта фаоллаштириш;
-
фойдаланмаётган SIМ-карталарга хизмат кўрсатишни тўхтатиш бўйича ариза юбориши;
-
телефон рақамига уланган пуллик хизматлар ҳақида маълумот олиши;
-
банк карталарини блоклаш (ёпиш) юзасидан эмитент банкка электрон ариза юбориши мумкин бўлади.
Бундан ташқари, портал орқали фуқароларга ўз номига янги нотариал ҳаракат расмийлаштирилгани ҳақида автоматик хабарнома юборилади ҳамда ушбу маълумотларнинг электрон ҳисоби юритилади.
Шунингдек, жисмоний ва юридик шахслар my.gov.uz орқали ўзларига тегишли кўчмас мулк ва автотранспорт воситаларини гаров ёки ипотекага қўйиш, уларни бегоналаштиришни тақиқлаш ёки мазкур тақиқни бекор қилиш бўйича ҳам мурожаат юбориш имкониятига эга бўлади.
