Энг фаол 200 та маҳаллага 2 миллиард сўмдан мукофот берилади
Янги ташаббуслар ҳисобига маҳаллалар буджетига тушум жорий йилда 1,6 триллион сўмга, келаси йилдан эса 2 триллион сўмга етказилади.
Президент Шавкат Мирзиёев раислигида ўтказилган видеоселектор йиғилишида маҳаллалар буджетини мустаҳкамлашга қаратилган янги ташаббуслар эълон қилинди.
Қайд этилишича, жорий йилда маҳаллалар буджетида 600 миллиард сўм маблағ қолиши режалаштирилган эди.
Хусусан, июнь ойидаги Президент фармонига мувофиқ, маҳаллаларда қоладиган ер ва мол-мулк солиғи улуши 10 фоиздан 15 фоизга оширилган. Шунингдек, санитария қоидаларини бузиш ҳамда ноқонуний қурилиш учун ундириладиган жарималарнинг 10 фоизи ҳам маҳалла буджетига йўналтирилади.
Бундан ташқари, майдони 5 минг квадрат метргача бўлган бўш биноларни маҳаллаларнинг ўзи сотувга чиқаришига рухсат берилди. Бу ҳисобига маҳаллалар буджетига қўшимча 405 миллиард сўм тушиши кутилмоқда.
Янги тартибга кўра, маҳалла ҳудудидаги нотурар объектлардан тушадиган ер ва мол-мулк солиғининг яна 5 фоизи ҳам маҳалланинг ўзида қолади. Натижада маҳаллалар ихтиёрида ҳар йили қўшимча 400 миллиард сўм маблағ шаклланади.
Шунингдек, йил якунида энг кўп тадбиркорларни рўйхатдан ўтказган, энг кўп янги иш ўрни яратган, солиқ тушуми юқори бўлган ҳамда энг кўп қўшимча солиқ базаси шакллантирган 200 та маҳаллага 2 миллиард сўмдан мукофот берилади.
Умуман олганда, янги ташаббуслар натижасида маҳаллалар буджетига тушум жорий йилда 1 триллион 600 миллиард сўмга, келгуси йилдан бошлаб эса 2 триллион сўмга етказилиши режалаштирилган.
