“Грин карта” олувчилар учун 100 минг долларгача гаров пули талаби жорий этилиши мумкин
Депозит миқдори ҳар бир аризачининг ҳолатига қараб ўзгариши мумкин.
АҚШ маъмурияти айрим мамлакатлар фуқароларидан “яшил карта” (доимий яшаш гувоҳномаси) олиш жараёнида молиявий кафолат сифатида тахминан 100 минг АҚШ доллари миқдорида гаров пули талаб қилиш имкониятини кўриб чиқмоқда. Бу ҳақда The Wall Street Journal нашри манбаларига таяниб хабар берди.
Нашр маълумотига кўра, депозит миқдори ҳар бир аризачининг ҳолатига қараб ўзгариши мумкин. Айрим ҳолларда у 100 минг доллардан кам ёки ундан кўп бўлиши эҳтимолдан холи эмас.
Қайд этилишича, АҚШ Давлат департаменти мазкур тизимни дастлаб чекланган миқдордаги давлатларда синов тариқасида жорий этишни таклиф қилган. Бироқ ушбу мамлакатлар рўйхати очиқланмаган.
Манбаларга кўра, гаров пули АҚШ учун молиявий кафолат вазифасини бажаради. Яъни, мамлакатга кўчиб ўтган шахс ўзини моддий жиҳатдан таъминлай олмаса, ушбу маблағдан фойдаланиш мумкин бўлади.
Давлат департаменти вакили Томми Пиготтнинг таъкидлашича, Доналд Трамп АҚШга иммиграция қилмоқчи бўлган шахслар молиявий жиҳатдан ўзини ўзи таъминлай олиши кераклигини бир неча бор таъкидлаган.
Режага кўра, АҚШнинг хориждаги консулликлари орқали “яшил карта”га мурожаат қилган айрим талабгорлар депозит қўйишлари шарт бўлади. Мазкур маблағ АҚШ фуқаролиги олинганидан сўнг қайтарилиши мумкин. The Wall Street Journal ёзишича, фуқароликни олиш жараёни одатда камида беш йил давом этади.
Ҳозирча ушбу таклиф расман жорий этилгани эълон қилинмаган.
