ХДП пуллик автотураргоҳлар учун жарима жорий этилишига қарши чиқди

 

Ўзбекистон Халқ демократик партияси (ХДП) Тошкент шаҳар ҳокимлиги томонидан жамоатчилик муҳокамасига қўйилган, пуллик автомобиль тўхташ жойлари учун тўловни амалга оширмаган ҳайдовчиларга маъмурий жарима белгилашни назарда тутувчи қонун лойиҳасига расмий муносабат билдирди.

Партия баёнотида қайд этилишича, мазкур ташаббусни амалдаги қонунчилик нуқтайи назаридан қабул қилиб бўлмайди.

 

ХДПнинг таъкидлашича, биринчи навбатда, Ўзбекистон Республикаси Конституциясининг 98-моддасига мувофиқ, Тошкент шаҳар ҳокимлиги қонунчилик ташаббуси ҳуқуқига эга субъектлар қаторига кирмайди. Шу сабабли кодексларга ўзгартириш киритишни назарда тутувчи қонун лойиҳаларини ҳокимлик ташаббуси билан илгари суриш Конституция талабларига мос келмайди.

 

Партия, шунингдек, пуллик автотураргоҳ хизматидан фойдаланганлик учун ҳақ тўлаш ҳайдовчи ва хизмат кўрсатувчи оператор ўртасидаги фуқаролик-ҳуқуқий муносабат эканини эслатди. Фуқаролик кодексига кўра, бундай қарздорлик юзага келганда уни маъмурий жарима орқали эмас, балки қонунчиликда белгиланган тартибда, жумладан суд орқали ундириш кераклиги таъкидланди.

 

Баёнотда маъмурий жавобгарлик давлат томонидан фақат жамоат ва давлат манфаатларини ҳимоя қилиш учун қўлланиши лозимлиги қайд этилиб, хусусий оператор даромадини таъминлаш мақсадида давлатнинг мажбурлов механизмларидан фойдаланиш ҳуқуқий давлат тамойилларига зид экани билдирилди.

 

ХДП яна бир масалага ҳам эътибор қаратди. Партия Тошкент шаҳар ҳокимлигининг пуллик автотураргоҳлардан фойдаланаётган ҳайдовчиларнинг атиги 2–3 фоизи тўловни амалга ошираётгани ҳақидаги баёноти жамоатчиликда шубҳа уйғотаётганини қайд этди. Чунки, партия фикрича, ҳозиргача пуллик автотураргоҳлардан тушаётган маблағлар ва уларнинг давлат буджетига ўтказилиши бўйича очиқ статистик маълумотлар эълон қилинмаган.

 

Шу муносабат билан ХДП ижро ҳокимияти органларини янги жарималар жорий этишга эмас, балки фуқаролар учун қулай ва сифатли инфратузилма яратиш, мавжуд хизматлар шаффофлигини таъминлаш ҳамда аҳоли манфаатларини устувор қўйишга чақирди.

 

Эслатиб ўтамиз, Тошкент шаҳар ҳокимлиги аввалроқ пуллик автотураргоҳ учун белгиланган тўловни амалга оширмаган ҳайдовчиларга Базавий ҳисоблаш миқдорининг 0,3 баравари миқдорида маъмурий жарима белгилашни таклиф қилган эди. Мазкур лойиҳа ҳозирда жамоатчилик муҳокамасидан ўтмоқда.