Маҳалла раисларига ерларни аукционга чиқариш ваколати берилади
Президент қарорига кўра, маҳалла раислари хусусий боғча, мактаб, клиника ва спорт иншоотлари қуриш учун ерларни аукционга чиқариш ваколатига эга бўлади.
Президент Шавкат Мирзиёев раислигида маҳаллаларга янги муҳит олиб кириш ҳамда “маҳалла еттилиги” фаолиятини янгича ташкил этишга бағишланган видеоселектор йиғилиши бошланди.
Йиғилишда Фарғона вилоятидаги Янги Қува маҳалласи мисолида аҳолини иш билан таъминлаш ва даромадини оширишнинг янги механизмлари тақдим этилди.
Қайд этилишича, мазкур маҳаллада 51 нафар ишсиз фуқаро мавжуд бўлиб, улардан тўрт нафари агротехникумни тамомлаган ва 10 сотихдан томорқа ерига эга. Янги тартибга кўра, маҳалла раиси томорқада гул кўчати етиштиришга ихтисослашган енгил конструкцияли иссиқхона қуриш учун маҳалла банкирига буюртма беради.
Шунингдек, маҳалла раиси ишсиз фуқароларнинг эҳтиёжини ўрганиб, ким тадбиркорлик билан шуғулланишни исташи, қайси оилага даромадини ошириш учун кредит, ускуна ёки ер зарурлигини аниқлайди ва бу бўйича маҳалла банкирига аниқ вазифалар юклайди.
Йиғилишда маҳаллаларда ижтимоий инфратузилмани ривожлантириш масаласига ҳам алоҳида эътибор қаратилди. Хусусан, Янги Қува маҳалласида боғча етишмаслиги сабабли 50 нафар бола қўшни маҳалладаги таълим муассасасига қатнаётгани, ҳудудда эса 70 сотих бўш ер мавжудлиги қайд этилди.
Шу муносабат билан эндиликда маҳаллаларда хусусий боғча, мактаб, клиника ва спорт иншоотлари қурилиши учун ер участкаларини аукционга чиқариш ваколати маҳалла раисларига берилиши маълум қилинди.
