Маҳаллалардаги сусткашлик учун 152 нафар раҳбар ишдан олинди
Президент йиғилишида 960 та камбағал оила яшайдиган 32 та маҳаллада бирорта ҳам эҳтиёжманд фуқаро доимий иш билан таъминланмагани танқид қилинди.
Президент Шавкат Мирзиёев раислигида маҳаллаларга янги муҳит олиб кириш ҳамда “маҳалла еттилиги” фаолиятини янгича ташкил этишга бағишланган видеоселектор йиғилишида камбағалликни қисқартириш борасидаги ишлар танқидий таҳлил қилинди.
Қайд этилишича, айрим ҳудудларда амалга оширилаётган лойиҳаларда камбағал оилалар иштироки 15 фоизга ҳам етмаяпти. Хусусан, Қораўзак, Марҳамат, Миришкор, Нуробод ва Термиз туманларидаги сусткашликлар мисол сифатида кўрсатиб ўтилди.
Йиғилишда 960 та камбағал оила яшайдиган 32 та маҳаллада бирорта ҳам эҳтиёжманд фуқаро доимий иш билан таъминланмагани алоҳида танқид қилинди. Шунингдек, 883 та маҳаллада банкирлар хонадонбай юриб лойиҳа ишлаб чиқмагани ва тадбиркорлар билан учрашмагани қайд этилди.
Шу муносабат билан йил бошидан буён маҳаллаларда ишларни самарали ташкил этмаган 152 нафар раҳбар лавозимидан озод этилган, яна 700 нафар масъулга нисбатан интизомий чоралар қўлланилган.
Йиғилишда маҳаллаларда солиқ тушумларини ошириш, жиноятчиликнинг олдини олиш ҳамда аҳоли муаммоларини ҳал этиш масалалари ҳам муҳокама қилинди.
Президент Шавкат Мирзиёев маҳалла одамлар учун “ишонч, таянч ва имкониятлар маркази” бўлиши зарурлигини таъкидлади.
