“Миллий саноат занжири” кўргазмасининг илк кунида қарийб 490 млрд сўмлик шартномалар имзоланди
Самарқандда ўтаётган транспорт соҳасига бағишланган кўргазмада 81 та ҳамкорлик меморандуми имзоланди.
Самарқанд вилоятида транспорт соҳасига бағишланган “Миллий саноат занжири” кўргазмасининг биринчи куни якунланди.
Кўргазманинг асосий мақсади маҳаллий ишлаб чиқарувчиларни йирик давлат буюртмачилари билан бевосита боғлаш, саноат кооперациясини ривожлантириш ҳамда янги маҳаллийлаштириш лойиҳаларини шакллантиришдан иборат.
Тадбир давомида 2 мингдан ортиқ маҳсулот ва технологик ечим намойиш этилди. Шунингдек, давлат буюртмачилари, ишлаб чиқарувчилар ҳамда инвесторлар иштирокида Б2Б ва Б2Г форматидаги учрашувлар ҳамда амалий музокаралар ташкил этилди.
Биринчи кун якунларига кўра:
80 дан ортиқ корхона кўргазмада иштирок этди;
кўргазмага 1 200 нафардан ортиқ ташриф буюрувчи келди;
30 та B2B учрашуви ўтказилди;
20 та B2B учрашуви ташкил этилди;
давлат харидлари доирасида 4 778 та, умумий қиймати 490 миллиард сўмлик шартномалар имзоланди;
янги ҳамкорликларни ривожлантириш мақсадида 81 та ҳамкорлик меморандуми расмийлаштирилди.
Кўргазма ўз ишини давом эттиради. Иккинчи кун давомида ҳам ҳамкорлик меморандумлари ва шартномаларини имзолаш, янги ишлаб чиқариш лойиҳалари юзасидан музокаралар ҳамда амалий учрашувлар ўтказилиши режалаштирилган.
