"Қўқон патири" географик кўрсаткич сифатида давлат рўйхатидан ўтказилди
Бу маҳсулот сифати ва гастрономик брендини ҳимоя қилишга хизмат қилади.
Адлия вазирлигида Фарғона вилоятининг миллий гастрономик мероси саналган "Қўқон патири" географик кўрсаткич сифатида давлат рўйхатидан ўтказилди.
Қўқон азалдан ҳунармандчилик, савдо ва миллий пазандачилик ривожланган йирик маданий марказлардан бири ҳисобланади. Мазкур ҳудудга хос бўлган "Қўқон патири" ўзининг бетакрор таъми, анъанавий рецепти ҳамда тайёрлаш технологияси билан ажралиб туради.
Ушбу нон тури ўзига хос тайёрлаш усули туфайли бир неча ҳафта давомида сифати ва таъмини сақлаб қолиши билан машҳур.
"Қўқон патири"нинг географик кўрсаткич сифатида давлат рўйхатидан ўтказилиши маҳсулот номи ҳамда уни тайёрлашнинг анъанавий технологиясини ҳуқуқий жиҳатдан ҳимоя қилиш, сифат стандартларини мустаҳкамлаш ва Фарғона вилоятининг гастрономик брендини халқаро миқёсда кенг тарғиб этишга хизмат қилади.
Маълумот учун, географик кўрсаткич — маҳсулотнинг муайян ҳудудга мансублигини ҳамда унинг сифати, обрўси ва ўзига хос хусусиятлари айнан шу ҳудуднинг табиий-иқлимий ва ижтимоий-маданий омиллари билан чамбарчас боғлиқлигини тасдиқловчи интеллектуал мулк объектидир.
