Тошкентда Африкадан юборилган кокаин аниқланди
Шунингдек, Бўстонлиқда 17 минг 600 туп кўкнори ҳамда 9 туп каннабис ўсимликларини ноқонуний равишда экиб парваришлаётган шахс қўлга олинди.
Тошкент ва Бўстонлиқда йирик миқдордаги гиёҳвандлик воситалари ҳамда тақиқланган ўсимликлар аниқланди. Бу ҳақда ДХХ хабар берди.
Маълум қилинишича, Серра-Леоне Республикасидан юборилган курьерлик жўнатмасини Тошкент шаҳрининг Яккасарой туманидаги хусусий курьерлик пунктидан қабул қилиб олаётган Яшнобод туманида яшовчи, 1983 йилда туғилган, муқаддам судланган фуқаро қўлга олинган.
Жўнатма текширилганда автоэҳтиёт қисмлари ичига яширилган 728 грамм кокаин борлиги аниқланган. Шунингдек, гумонланувчининг яшаш хонадонидан зип пакетларга жойланган кукунсимон моддалар ҳамда таркибида гиёҳвандлик воситалари бўлган ширинликлар ашёвий далил сифатида олинган.
Мазкур ҳолат юзасидан фуқаро Жиноят кодексининг 246-моддаси 2-қисми билан жавобгарликка тортилиб, жиноят иши қўзғатилган. Ҳозирда тергов ҳаракатлари олиб борилмоқда.
Яна бир тезкор тадбир давомида ДХХ ва Ички ишлар органлари ходимлари Тошкент вилоятининг Бўстонлиқ туманида 1971 йилда туғилган фуқаронинг тақиқланган гиёҳвандлик ўсимликларини ноқонуний равишда экиб парваришлаётганини аниқланган.
Гилавасой қишлоғи яқинидаги тоғ ёнбағирларида ўтказилган кўздан кечириш жараёнида 17 минг 600 туп кўкнори ҳамда 9 туп каннабис ўсимлиги топилган. Шунингдек, гумонланувчининг яшаш хонадонидан қуритилган кўкнори бошоқлари ва майдаланган ҳолда сақланаётган кўкнори маҳсулотлари ҳам аниқланган.
Мазкур ҳолат юзасидан унга нисбатан Жиноят кодексининг 270-моддаси 2-қисми «в» банди ҳамда 25, 273-моддаси 6-қисми «а» банди билан жиноят иши қўзғатилиб, тергов ҳаракатлари давом эттирилмоқда.
