Тошкентда ерусти метро бекатининг томи қулаб тушди, икки йўловчи жароҳатланди
Ҳозирда поездлар ҳаракати вақтинча тўхтатилган.
Тошкент метросининг “Ер усти ҳалқа” йўналишидаги «Турон» метро бекатида том конструкциясининг бир қисми силжиб тушгани сабабли поездлар ҳаракати вақтинча тўхтатилди.
“Тошкент метрополитени” ДУК маълум қилишича, ҳодиса 16 июль куни соат 14:34 да содир бўлган.
Ҳаракат хавфсизлигини таъминлаш мақсадида мазкур бекатда метро поездлари қатнови зудлик билан вақтинча тўхтатилган. Ҳозирда мутахассислар томонидан техник ўрганиш ишлари олиб борилмоқда ҳамда аниқланган камчиликларни бартараф этиш чоралари кўрилмоқда.
Ҳодиса оқибатида икки нафар йўловчи енгил тан жароҳати олган. Уларга воқеа жойининг ўзида биринчи тиббий ёрдам кўрсатилган.
Йўловчиларга қулайлик яратиш мақсадида «Қипчоқ» ва «Қурувчилар» метро бекатлари оралиғида бепул метробуслар қатнови йўлга қўйилган.
