Андижонда бозор ёниб кетди
Ёнғин оқибатида жабрланганлар йўқ, ҳодиса сабаби ўрганилмоқда.
Андижон вилоятининг Асака туманида жойлашган савдо растасида ёнғин юз берди. Бу ҳақда вилоят Фавқулодда вазиятлар бошқармаси хабар берди.
Маълум қилинишича, ҳодиса 16 июль куни соат 23:43 да Асака тумани Марғилоний кўчасида жойлашган савдо растасида содир бўлган. Хабар келиб тушгач, ёнғин-қутқарув экипажлари соат 23:48 да воқеа жойига етиб борган.
Қутқарувчиларнинг тезкор ҳаракатлари натижасида ёнғин 17 июль куни соат 00:10 да тўлиқ бартараф этилган.
Ёнғин оқибатида савдо растасининг 60 квадрат метр майдонидаги шифт ва том қисми, шунингдек, кийим-кечак маҳсулотлари ёниб зарар кўрган.
Ҳодиса оқибатида жабрланганлар йўқ.
Айни пайтда ёнғиннинг келиб чиқиш сабаби ҳамда етказилган моддий зарар миқдорини аниқлаш бўйича суриштирув ишлари олиб борилмоқда.
