Бухоро ва Қорақалпоғистонда ноқонуний дори савдосига чек қўйилди
Яширин цехда қалбаки дори тайёрлаган шахс, яна бир тадбиркор эса дори воситаларини 5 600 долларга сотаётган вақтида ушланди.
Бухоро вилояти ҳамда Қорақалпоғистон Республикасида ўтказилган тезкор тадбирлар давомида қалбаки ва ноқонуний муомаладаги катта миқдордаги дори воситалари аниқланди. Бу ҳақда Давлат хавфсизлик хизмати маълум қилди.
Маълум қилинишича, ДХХнинг Бухоро вилояти бўйича бошқармаси ҳамда Иқтисодий жиноятларга қарши курашиш департаменти ходимлари ҳамкорлигида Ғиждувон туманида яшовчи тадбиркорга тегишли дорихона, яшаш хонадони ва автомашинаси кўздан кечирилган.
Текширув давомида тадбиркор ўз уйида яширин цех ташкил этиб, дори воситаларининг ёрлиқ ва йўриқномаларини ўзгартириш орқали қалбаки дори воситалари тайёрлагани аниқланган.
Тезкор тадбирда 111 турдаги 25 716 дона дори воситаси, шунингдек, бўш қутилар, ёрлиқлар, йўриқномалар ва бошқа воситалар ашёвий далил сифатида расмийлаштириб олинган.
“Фармацевтика маҳсулотлари хавфсизлиги маркази” давлат муассасаси хулосасига кўра, аниқланган дориларнинг 30 тури давлат реестрида қайд этилмаган, 50 турига эса мувофиқлик сертификати расмийлаштирилмаган.
Яна бир тезкор тадбирда Ғиждувон туманида фармацевтика фаолияти билан шуғулланувчи МЧЖ раҳбари давлат реестрида қайд этилмаган ва сифат сертификатига эга бўлмаган 16 дона «Октагам» дори воситасини 5 600 АҚШ долларига сотаётган вақтида қўлга олинган.
Шунингдек, унга тегишли дорихонадан 109 турдаги 32 094 дона сифат сертификатисиз дори воситалари ҳужжатлаштириб олинган.
Қорақалпоғистон Республикасида эса ДХХ ва божхона органлари ҳамкорлигида ўтказилган тезкор тадбир давомида Нукус туманида яшовчи 1989 йилда туғилган фуқаро ўз хонадонида ноқонуний дори омбори ташкил этгани аниқланган.
Унинг яшаш манзилидан 65 турдаги 12 958 дона дори воситаси, шунингдек, уларни қадоқлаш учун мўлжалланган 2 410 дона штрих-код ва этикетка ашёвий далил сифатида мусодара қилинган.
Мутахассислар хулосасига кўра, ушбу дори воситалари белгиланган сақлаш талабларига риоя қилинмаган ҳолда сақланган бўлиб, 16 турдаги препаратнинг яроқлилик муддати ўтган.
Ҳозирда барча ҳолатлар юзасидан жиноят ишлари қўзғатилиб, тергов ҳаракатлари олиб борилмоқда.
