Эрон Қувайтдаги АҚШ ҳарбий объектларига зарба берди
Ироқ ва Қатар ҳудудларида ҳам портлашлар кузатилган.
Эрон Қувайт ҳудудида жойлашган АҚШ ҳарбий объектларига дронлар ёрдамида зарба берганини маълум қилди. Бу ҳақда Фарс ахборот агентлиги хабар берди.
Маълум қилинишича, ҳужумлар Қувайтдаги АҚШ ҳарбий казармалари ва логистика марказларига қаратилган бўлиб, операцияда «Араш» русумидаги учувчисиз учиш аппаратларидан фойдаланилган.
Эрон ҳарбийлари баёнотида ушбу зарбалар «Чақмоқ» операциясининг 12-босқичи доирасида амалга оширилгани қайд этилган.
Шунингдек, Эрон томони худди шу турдаги дронлар Баҳрайндаги Сахир авиабазаси ҳудудида жойлашган АҚШ Ҳарбий-ҳаво кучлари объектларига қарши ҳам қўлланилганини билдирган.
Хабарларга кўра, Ироқ ва Қатар ҳудудларида ҳам портлашлар кузатилган.
ТАСС агентлигининг ёзишича, Эрон ушбу ҳужумларни АҚШ ҳарбийларининг сўнгги ҳаракатларига жавоб сифатида амалга оширганини таъкидлаган.
Шу билан бирга, АҚШ Марказий қўмондонлиги Эрон ҳудудидаги бир қатор ҳудудларда портлашлар содир бўлганини маълум қилган. Хусусан, Бандар Аббос, Қешм ороли, Аҳваз, Бушеҳр, Бандар Хомейний, Бандар Ленгеҳ, Вайциан, Чобаҳор ҳамда Эроншаҳр аэропорти яқинида ҳужумлар қайд этилгани билдирилган.
