Ўрмон ёнғинлари сабаб ЖЧ–2026 финали кўчирилиши мумкин

 

Канадада давом этаётган кенг кўламли ўрмон ёнғинлари натижасида ҳосил бўлган тутун АҚШ ва Канаданинг йирик шаҳарларини эгаллаб олган. Ҳаво сифатининг кескин ёмонлашуви сабаб Шимолий Америкадаги бир қатор футбол учрашувлари қолдирилган ёки ўйин шароитлари ўзгартирилган. Мутахассислар бу вазият 2026 йилги FIFA Жаҳон чемпионати финалига ҳам таъсир қилиши мумкинлигини таъкидламоқда.

 

Тутун энг кўп АҚШнинг шимоли-шарқий ҳудудлари, жумладан Нью-Йорк, Нью-Жерси, шунингдек Канаданинг Торонто шаҳрини қоплаган. Айнан шу ҳудудларда эркаклар ва аёллар ўртасидаги профессионал футбол мусобақалари ўтказилади. Ҳаво сифати ёмонлашгани сабаб айрим учрашувлар кечиктирилган, бошқаларида эса қўшимча сув ичиш танаффуслари жорий этилган.

 

Спорт шифокорларининг таъкидлашича, ёнғин тутуни таркибидаги майда заррачалар спортчиларнинг нафас олиш тизими ва юрак-қон томир фаолиятига салбий таъсир кўрсатиши мумкин. Айниқса юқори жисмоний юклама остида бу хавф янада ортади. Шу сабаб мутахассислар зарурат туғилганда машғулотларни ёпиқ иншоотларга кўчириш ёки учрашувларни бошқа вақтга суришни тавсия қилмоқда.

 

Жаҳон чемпионати финали 20 июль куни АҚШнинг Нью-Жерси штатидаги MetLife Stadiumда ўтказилиши режалаштирилган. Ушбу стадион очиқ осмон остида жойлашгани боис ҳаво сифати бевосита учрашув ўтказилишига таъсир қилиши мумкин. Бироқ метеорологлар ҳафта охирида кучли ёмғир ва совуқ ҳаво оқимининг мамлакатга кириб келиши кутилаётгани сабаб финалга қадар тутун сезиларли даражада тарқалишини прогноз қилмоқда.

 

Шунга қарамай, экологлар ва соғлиқни сақлаш мутахассислари иқлим ўзгариши оқибатида ўрмон ёнғинлари тобора тез-тез кузатилаётганини, бу эса келажакдаги йирик спорт мусобақаларини ташкил этишда янги муаммоларни юзага келтираётганини қайд этмоқда. Уларнинг фикрича, FIFA ва бошқа спорт ташкилотлари об-ҳаво ҳамда ҳаво сифати билан боғлиқ фавқулодда ҳолатлар учун янада қатъий протоколлар ишлаб чиқиши зарур.