Трамп Хитойни сайловларга аралашганликда айблади

 

АҚШ президенти Доналд Трамп Хитойни 2020 йилги президентлик сайловларига аралашганликда айблаб, Пекин “АҚШ сайловлари тарихидаги энг йирик маълумотлар бузилиши”ни амалга оширганини даъво қилди. У бу ҳақда Оқ уйда қилган мурожаати давомида маълум қилди.

 
Трампнинг айтишича, махфийликдан чиқарилган разведка ҳужжатларида Хитой АҚШдаги миллионлаб сайловчиларга оид маълумотларни қўлга киритгани қайд этилган. Президент ушбу маълумотлар 2020 йилги сайлов натижаларига таъсир кўрсатган бўлиши мумкинлигини билдирган, бироқ ўз баёнотини тасдиқловчи аниқ далилларни оммага тақдим этмаган.

 
Reuters қайд этишича, Трампнинг янги айбловлари АҚШ разведка ҳамжамиятининг аввалги хулосаларига зид. Илгари эълон қилинган расмий баҳолашларда Хитой АҚШ сиёсий жараёнларига таъсир ўтказишга урингани ҳақида маълумотлар мавжуд бўлсада, 2020 йилги президентлик сайлови натижаларини ўзгартирганига оид далиллар топилмаган. Шунингдек, кўплаб суд қарорлари, қайта овоз санаш жараёнлари ва мустақил текширувлар Жо Байденнинг ғалабасини тасдиқлаган ҳамда кенг кўламли сайлов фирибгарлиги аниқланмаганини кўрсатган.

 
Трамп ўз мурожаатида сайлов хавфсизлигини кучайтириш зарурлигини ҳам таъкидлаб, шахсни тасдиқловчи ҳужжатлар билан овоз бериш талабларини кучайтиришни яна бир бор қўллаб-қувватлаган. Унинг маъмурияти сайлов тизимидаги заифликлар бўйича айрим разведка материалларини махфийликдан чиқарганини ҳам маълум қилган.

 
Таҳлилчиларнинг фикрича, Трампнинг Хитойга нисбатан янги айбловлари Вашингтон ва Пекин ўртасидаги муносабатларга салбий таъсир кўрсатиши мумкин. Reuters манбаларига кўра, икки давлат раҳбарлари ўртасида яқин ойлар ичида режалаштирилган учрашув олдидан бундай баёнотлар дипломатик муҳитни мураккаблаштириши эҳтимолдан холи эмас.