Ярим йилда электр ва газ таъминоти бўйича 39 мингдан ортиқ мурожаат келиб тушди

Президент Шавкат Мирзиёевга ёқилғи-энергетика соҳасидаги мурожаатлар таҳлили юзасидан ахборот тақдим этилди.

 

Унда қайд этилишича, 2026 йилнинг биринчи ярмида аҳолидан электр ва газ таъминоти масалалари бўйича 39 минг 220 та мурожаат келиб тушган. Бу кўрсаткич ўтган йилнинг шу даврига нисбатан 26,1 фоизга камайган бўлса-да, тизимдаги муаммолар сақланиб қолмоқда.

 

Мурожаатларнинг қарийб ярми табиий ва суюлтирилган газ таъминоти, 38,3 фоизи эса электр таъминоти билан боғлиқ бўлган.

 

Фуқаролар асосан электр энергиясининг тез-тез узилиши, эскирган электр тармоқлари ва трансформаторларни таъмирлаш, табиий газ босимининг пастлиги ҳамда газ баллонларини ўз вақтида тўлдириш ва етказиб бериш масалалари юзасидан мурожаат қилган.

 

Йиғилишда ҳар бир мурожаат алоҳида шикоят эмас, балки муайян ҳудуддаги тизимли муаммоларни кўрсатувчи сигнал сифатида баҳоланиши кераклиги таъкидланди.

 

Президент масъулларга куз-қиш мавсуми бошлангунига қадар аҳоли томонидан такроран мурожаат қилинаётган маҳаллаларни ўрганиш, электр ва газ тармоқларининг техник ҳолатини текшириш ҳамда аниқланган камчиликларни бартараф этиш бўйича алоҳида чора-тадбирлар ишлаб чиқишни топширди.

 

Шунингдек, электр узилишлари кўп кузатилаётган ҳудудларда тармоқлар ва трансформаторларни таъмирлаш, авария бригадаларини доимий шай ҳолатда сақлаш, газ босими паст бўлган ҳудудларда эса таъминотни барқарорлаштириш ҳамда газ баллонларини етказиб бериш графикларига қатъий риоя этиш вазифалари белгиланди.

 

Давлат раҳбари масъулларга совуқ мавсум бошланишидан олдин мурожаатларда кўтарилган асосий муаммоларни бартараф этиш ҳамда аҳоли ва ижтимоий объектларни электр энергияси, газ ва бошқа ёқилғи ресурслари билан узлуксиз таъминлаш бўйича кўрсатмалар берди.