Ўзбекистонда аномал иссиқ қачон пасайиши маълум қилинди
Прогнозларга кўра, ҳаво ҳарорати 6–9 даражага пасаяди.
Ўзбекистонда кузатилаётган аномал иссиқ об-ҳаво 21 июлдан бошлаб босқичма-босқич пасая бошлайди. Бу ҳақда «Ўзгидромет» маълум қилди.
Прогнозга кўра, 18–20 июль кунлари республика бўйлаб жазирама сақланиб қолади. Кундуз кунлари ҳаво ҳарорати 42–45 даражагача, жанубий ва чўл ҳудудларда эса 46–48 даражагача кўтарилиши кутилмоқда.
Шамол тезлиги 9–14 метр/секундни ташкил этади, айрим ҳудудларда 15–18 метр/секундгача, шимол, жануб ва чўл ҳудудларида эса баъзан 20–22 метр/секундгача кучайиши ҳамда чанг-тўзон кузатилиши мумкин.
Маълум қилинишича, 20 июль куни республиканинг аксарият ҳудудларида экстремал иссиқ об-ҳаво сақланиб қолади. Фақат шимоли-ғарбий ҳудудларда ҳарорат пасая бошлайди.
21 июлдан бошлаб эса мамлакатнинг барча ҳудудларида иссиқ чекиниши кутилмоқда. Прогнозларга кўра, ҳаво ҳарорати 6–9 даражага пасаяди.
Тошкент шаҳрида жума куни ҳаво ҳарорати 41–43 даража, шанба ва якшанба кунлари эса 43–45 даражагача кўтарилади. Кечалари ҳарорат 25–28 даража атрофида бўлиши прогноз қилинмоқда.
