Ўзбекистонда жазирама сабаб электрга вақтинчалик чекловлар ўрнатилмоқда
Қашқадарё, Жиззах, Хоразм ва Тошкент вилоятларидан минглаб истеъмолчилар вақтинча электр таъминотидан узилган.
Ўзбекистонда кузатилаётган аномал иссиқ ҳаво электр энергиясига бўлган талабни кескин оширди. Натижада мамлакат ягона энергетика тизимида электр истеъмоли ҳам, ишлаб чиқариш ҳажми ҳам тарихий рекорд даражага етди. Бу ҳақда Энергетика вазирлиги маълум қилди.
Вазирлик маълумотларига кўра, 2026 йил 16 июль куни суткалик электр энергияси истеъмоли 291 миллион кВт·соатни ташкил этиб, ёзги мавсум учун янги рекорд қайд этилди. Бу ўтган йил ёзида кузатилган энг юқори кўрсаткичдан 18,4 миллион кВт·соатга ёки 6,7 фоизга кўп. Шу куни суткалик электр энергияси ишлаб чиқариш ҳажми ҳам 295,4 миллион кВт·соатга етиб, янги рекорд ўрнатди. Таққослаш учун, 15 июль куни бу кўрсаткич 291,4 миллион кВт·соат бўлган.
Энергетика вазирлиги изоҳига кўра, юқори ҳарорат электр узатиш тармоқлари ва трансформатор ускуналарининг меъёридан ортиқ қизишига олиб келмоқда. Бунга минглаб кондиционерлар, совутгичлар ва бошқа электр жиҳозларининг бир вақтда ишлаши сабаб тармоқлардаги юклама янада ортмоқда. Натижада ускуналарнинг ишдан чиқиши ёки йирик авариялар юзага келиш хавфи кучаяди.
Шу сабабли энерготизим барқарорлигини сақлаш ва йирик носозликларнинг олдини олиш мақсадида диспетчерлик хизматлари айрим ҳудудларда қисқа муддатли мажбурий чекловларни жорий этмоқда. Вазирликнинг таъкидлашича, бундай чоралар электр қурилмаларининг куйиб кетиши ҳамда таъмирлаш ишлари бир неча кун давом этадиган йирик аварияларнинг олдини олиш учун зарур.
Маълум қилинишича, айрим ҳудудларда электр таъминоти 2 соатгача вақтинча чекланган. Жумладан, Қашқадарё вилоятининг Кўкдала ва Чироқчи туманларида 1 750 нафар истеъмолчи, Жиззах вилоятининг Шароф Рашидов ва Зомин туманларида 1 200 нафар истеъмолчи, Хоразм вилоятининг Шовот, Гурлан ва Қўшкўпир туманларида 1 300 нафар истеъмолчи, Тошкент вилоятининг Тошкент ва Зангиота туманларида 1 000 нафар истеъмолчи вақтинча электр таъминотидан узилган.
Вазирликнинг билдиришича, ҳудудларда туну кун ишлаётган махсус авария бригадалари электр тармоқларида юзага келаётган носозликларни имкон қадар қисқа муддатда бартараф этмоқда.
Энергетика вазирлиги фуқароларни электр энергиясидан оқилона ва тежамкор фойдаланишга чақириб, зарурат бўлмаган ҳолларда электр жиҳозларини ўчириб туриш тизимдаги ортиқча юкламани камайтириш ва йирик узилишларнинг олдини олишга ёрдам беришини таъкидлади.
