Жазирама сабаб Тошкентда минглаб истеъмолчилар электрсиз қолди
Олмазор, Чилонзор, Юнусобод, Сергели ва бошқа туманларда жами 8 250 истеъмолчининг электр таъминоти узилди.
Ҳаво ҳароратининг кескин кўтарилиши ҳамда электр тармоқларига тушаётган юкламанинг ортиши сабабли Тошкент шаҳри ва Тошкент вилоятининг айрим ҳудудларида электр таъминотида вақтинчалик узилишлар кузатилди.
Энергетика вазирлиги маълумотига кўра, соат 14:30 ҳолатига Тошкент шаҳри ва вилоятидаги айрим электр узатиш тармоқлари ҳамда подстанцияларда техник носозликлар юзага келган.
Шу сабабли Олмазор, Яккасарой, Чилонзор, Юнусобод, Яшнобод, Мирзо Улуғбек, Сергели ва Зангиота туманларидаги жами 8 250 нафар истеъмолчининг электр таъминоти вақтинча узилган.
Ҳозирда махсус авария бригадалари томонидан носозликларни бартараф этиш ва истеъмолчиларни электр энергияси билан қайта таъминлаш ишлари олиб борилмоқда.
Энергетика мутасаддилари юзага келган ноқулайликлар учун истеъмолчилардан узр сўради.
Шунингдек, электр таъминотидаги режали ва фавқулодда узилишлар бўйича маълумотлар туман электр таъминоти корхоналари ҳамда Тошкент шаҳар ва Тошкент вилояти ҳокимликларининг расмий Телеграм каналлари орқали мунтазам эълон қилиб борилаётгани маълум қилинди.
