Аномал иссиқ фонида электр истеъмоли рекорди янгиланди
Электр энергияси истеъмоли ва ишлаб чиқариш ҳажми аввалги рекордлардан ҳам юқори бўлди.
Ўзбекистон ягона энергетика тизимида 2026 йил 17 июль куни электр энергияси истеъмоли ва ишлаб чиқариш бўйича навбатдаги рекорд кўрсаткичлар қайд этилди.
Энергетика вазирлиги маълумотига кўра, суткалик электр энергияси истеъмоли 293,4 млн кВт·соатни ташкил этиб, ўтган йил ёзги мавсумидаги энг юқори кўрсаткичдан 20,8 млн кВт·соатга ёки 7,6 фоизга юқори бўлган.
Шунингдек, суткалик электр энергияси ишлаб чиқариш ҳажми 296,1 млн кВт·соатни ташкил этиб, 16 июлда қайд этилган рекорддан 0,7 млн кВт·соатга (0,24 фоизга) ошган.
Кичик қувватли қуёш фотоэлектр станциялари ишлаб чиқарган энергия билан биргаликда 17 июль куни мамлакат бўйича жами 305 млн кВт·соат электр энергияси ишлаб чиқарилди. Бу аввалги кун кўрсаткичидан 9,6 млн кВт·соатга ёки 3,2 фоизга кўпдир.
Қайд этилишича, диспетчерлик хизматлари электр тармоқларидаги юклама ҳамда трансформатор ва бошқа ускуналарнинг техник ҳолатини реал вақт режимида доимий назорат қилмоқда. Зарурат туғилганда юкламани қайта тақсимлаш ва бошқа тезкор чоралар кўрилиб, технологик носозликлар ҳамда йирик узилишларнинг олди олинмоқда.
