Қарийб 1800 нафар тадбиркорнинг электр энергияси бўйича имтиёзи тикланди
Тўқимачилик ва тикув-трикотаж корхоналаридан электр энергияси учун олдиндан тўлов ундириш амалиёти тўхтатилди.
Бизнес-омбудсман Наманган шаҳридаги «М.Г.» МЧЖ мурожаати асосида тўқимачилик ва тикув-трикотаж соҳасида фаолият юритаётган тадбиркорлик субъектларига қонунчиликда белгиланган имтиёзларнинг қўлланилиши юзасидан республика миқёсида ўрганиш ўтказди.
Маълум қилинишича, Президентнинг 2023 йил 10 январдаги ПФ–2-сон Фармонига мувофиқ, мазкур соҳада фаолият юритувчи тадбиркорлар учун электр энергияси истеъмоли бўйича бир ойлик олдиндан тўлов талаби бекор қилинган.
Бироқ ўрганиш давомида республиканинг кўплаб ҳудудларидаги корхоналарга нисбатан ушбу имтиёз амалда қўлланилмагани, улардан электр энергияси учун олдиндан тўлов ундириш амалиёти давом этаётгани аниқланган.
Шундан сўнг Бизнес-омбудсман девони томонидан тадбиркорларнинг ҳуқуқ ва қонуний манфаатларини тиклаш ҳамда ноқонуний ундирувларни бекор қилиш юзасидан тегишли хулоса киритилган.
Натижада 1 798 та тадбиркорлик субъектига нисбатан қонуний имтиёзлар қайта қўлланилди. Шунингдек, 84,7 миллиард сўм миқдоридаги асоссиз ҳисобланган маблағ ҳисобдан чиқарилди.
Бундан ташқари, тўқимачилик ва тикув-трикотаж корхоналаридан электр энергияси учун бир ойлик олдиндан тўлов ундириш амалиёти тўхтатилди.
Ўрганиш якунларига кўра, тадбиркорларга белгиланган имтиёзларни қўлламаган 109 нафар мансабдор шахсга нисбатан Маъмурий жавобгарлик тўғрисидаги кодекснинг 241⁶-моддаси асосида маъмурий баённомалар расмийлаштирилди ва уларнинг жавобгарлиги масаласи кўриб чиқилди.
