Белгия босиб олинган Фаластин ерларида ишлаб чиқарилган Исроил маҳсулотларини импорт қилишни тақиқлади
Испания, Нидерландия, Словения ва Ирландия ҳам шундай чекловлар жорий этган эди.
Белгия федерал ҳукумати босиб олинган Фаластин ҳудудларидаги Исроил манзилгоҳларида ишлаб чиқарилган маҳсулотларни мамлакатга олиб киришни тақиқлашни маъқуллади. Бу ҳақда Al Jazeera хабар берди.
Қайд этилишича, қарор ҳукуматнинг ёзги таътил олдидан ўтказилган сўнгги Вазирлар Маҳкамаси йиғилишида қабул қилинган. Мазкур тақиқ Исроилнинг Ғазодаги ҳарбий амалиётлари фонида Белгия ҳукумати ўтган йили берган ваъдасининг бажарилиши сифатида баҳоланмоқда.
Белгия ташқи ишлар вазири Максим Прево аввалроқ Брюсселда ўтган йиғилишда Европа Иттифоқи бўйлаб ҳам шундай тақиқ жорий этишга чақирган. Бироқ аъзо давлатлар бу масалада ҳозирча ягона қарорга кела олмаган.
Жорий йилда Global Echo Litigation Center томонидан ўтказилган тергов давомида Исроилдан Европага экспорт қилинган 30 мингдан ортиқ ҳужжат таҳлил қилинган. Унда Ғарбий Соҳил ва Голан тепаликларидаги Исроил манзилгоҳларида етиштирилган маҳсулотлар кўпинча Исроилда ишлаб чиқарилган маҳсулот сифатида расмийлаштирилгани аниқланган.
Белгия бу борада мустақил чоралар кўрган Европа давлатлари қаторига қўшилди. Аввалроқ Испания, Нидерландия, Словения ва Ирландия ҳам Исроил манзилгоҳларида ишлаб чиқарилган маҳсулотларга нисбатан чекловлар жорий этган эди.
Собиқ Европа амалдорлари эса Европа Иттифоқини ушбу масалада умумий тақиқ жорий этишга чақириб, алоҳида давлатлар қабул қилаётган қарорлар ягона иттифоқ сиёсатисиз чекланган самара беришини таъкидлаган.
