Мужтабо Хоманаийнинг илк халқаро мулоқоти Путин билан бўлиши мумкин — ТАСС
Эрон манбаси Эроннинг олий раҳбари ва Россия президенти ўртасида яқин вақт ичида телефон суҳбати ёки учрашув ўтказилиши эҳтимолини билдирди.
Эроннинг янги олий раҳбари Мужтабо Хоманаийнинг биринчи халқаро алоқаси Россия президенти Владимир Путин билан телефон орқали мулоқот ёки шахсий учрашув бўлиши мумкин. Бу ҳақда ТАСС агентлиги эронлик манбага таяниб хабар берди.
Манба Россияни Эроннинг яқин ҳамкорларидан бири, Владимир Путинни эса Ислом Республикасининг яқин дўсти сифатида таърифлаган.
“Эҳтимол, биринчи телефон қўнғироғи ва биринчи учрашув Президент Владимир Путин билан бўлади”, — деган агентлик суҳбатдоши.
Шунингдек, унинг сўзларига кўра, мамлакатдаги ҳарбий вазият ва хавфсизлик билан боғлиқ омиллар сабаб Мужтабо Хоманаий ҳозирча омма олдида кўринмаяпти.
Аввалроқ айрим нашрларда Мужтабо Хоманаий соғлиғи билан боғлиқ турли хабарлар тарқалган эди. Бироқ Эроннинг Россиядаги элчиси Козим Жалолий бу маълумотларни рад этиб, Хоманаий тирик ва соғлом эканини билдирган.
