Президент фуқароларнинг ижтимоий реестрга киритиш бўйича аризаси асоссиз рад этилганини танқид қилди

Президент Шавкат Мирзиёев 16 июль куни ўтказилган видеоселектор йиғилишида жойларда эҳтиёжманд оилаларни ижтимоий реестрга киритишни асоссиз рад этиш ва уларни сунъий равишда реестрдан чиқариш ҳолатлари кузатилаётганини танқид қилди.

 

Давлат раҳбарининг таъкидлашича, 184 та маҳаллада бир ой ичида фуқаролардан келган 2 мингта аризанинг барчаси асоссиз рад этилган. Оқибатда эҳтиёжманд оилалар ижтимоий ёрдам, фарзандларини боғча ва тўгаракларга жойлаштириш каби кафолатланган хизматлардан фойдалана олмаган.

 

Бундай ҳолатлар, айниқса, Бўстон, Олтинкўл, Ховос, Тошлоқ, Шароф Рашидов, Учқудуқ ва Деҳқонобод туманларида кўп учраётгани қайд этилди.

 

Шунингдек, йил бошидан буён ижтимоий реестрга киритиш масаласида Президент виртуал қабулхонасига келиб тушган мурожаатлар сони 30 мингдан 46 мингтагача, яъни 1,5 баробарга ошгани маълум қилинди.

 

Йиғилишда Бош прокуратурага ижтимоий реестрнинг тўғри юритилиши устидан қатъий назорат ўрнатиш, Ижтимоий ҳимоя миллий агентлиги директорининг биринчи ўринбосари Шаҳноза Мирзиёевага эса реестрнинг ҳаққонийлиги юзасидан президентга мунтазам ахборот бериб бориш вазифаси юклатилди.

 

Бундан ташқари, мутасаддилар олдига йил якунигача ногиронликни эрта аниқлаш, уй-жойларни мослаштириш, ижтимоий уйга жойлаштириш каби 25 турдаги ижтимоий хизматни маҳаллалар даражасига тушириш топширилди.

 

Уч ой ичида деменция ва ақлий заифлиги бўлган шахслар учун 250 та маҳаллада кундузги ва уйда парвариш хизматлари ҳамда “Мадад” уйлари, 75 та маҳаллада эса ўзгалар парваришига муҳтож кексалар учун “Фаол ҳаёт” дастури йўлга қўйилиши режалаштирилган. Шунингдек, қаровсиз қолган ва зўравонликка учраган болалар учун “Қўллаб-қувватлаш марказ”лари ташкил этилади.