Тошкентда 58-Халқаро кимё олимпиадаси якунланди
Ўзбекистон терма жамоаси мусобақани 1 та олтин ва 3 та кумуш медаль билан тамомлади.
19 июнь куни Тошкент шаҳрида 58-Халқаро кимё олимпиадасининг тантанали тақдирлаш маросими бўлиб ўтди. Унда Ўзбекистон шарафини ҳимоя қилган тўрт нафар ўқувчининг барчаси совриндорлар қаторидан жой олди. Бу ҳақда Zamon.uz мухбири хабар берди.
Якуний натижаларга кўра, Райҳона Туймуродова олтин медални қўлга киритди. Жасур Мустафоев, Азизмуҳаммад Ҳафизов ҳамда Миржалол Ҳомиджонов эса кумуш медаль билан тақдирланди.
Ўзбекистон тарихда илк бор мазкур нуфузли халқаро фан олимпиадасига мезбонлик қилди. Мусобақада дунёнинг 90 дан ортиқ давлатидан иқтидорли ўқувчилар иштирок этиб, назарий ва амалий босқичларда ўз билимларини синовдан ўтказди.
Халқаро кимё олимпиадаси дунёдаги энг нуфузли фан мусобақаларидан бири ҳисобланади. Унда ҳар бир мамлакатдан тўрт нафаргача ўқувчи қатнашади. Иштирокчилар беш соатлик назарий ҳамда беш соатлик лаборатория-амалий имтиҳонларда мураккаб кимёвий масалаларни ечиш бўйича беллашади.
Маълумот учун, Президентнинг 2024 йил 30-сентабрдаги тегишли қарорига мувофиқ, нуфузли халқаро фан олимпиадаларида медаль қўлга киритган ўзбекистонлик иштирокчилар пул мукофоти билан тақдирланади. Мазкур тартибга кўра, олтин медаль соҳибига 1 миллиард 30 миллион сўм, кумуш медаль соҳибига 618 миллион сўм, бронза медаль соҳибига эса 412 миллион сўм мукофот берилади.
Шунингдек, олтин медаль совриндорининг устозига 185,4 миллион сўм, кумуш медаль совриндорининг устозига 103 миллион сўм, бронза медаль совриндорининг устозига эса 61,8 миллион сўм пул мукофоти тўланади.
Ўзбекистон терма жамоасининг натижаларидан келиб чиқиб, ўқувчилар учун ажратиладиган жами мукофот пули 2 миллиард 884 миллион сўмни ташкил этади. Уларни тайёрлаган устозларга эса жами 494,4 миллион сўм миқдорида мукофот берилади. Бундан ташқари, ғолибларни халқаро олимпиадага тайёрлаган ўқитувчиларнинг малака тоифаси бир поғона оширилиши белгиланган.
