Аномал иссиқда ҳашар ва жамоавий ишларни ўтказмаслик талаб этилди

 

Давлат меҳнат инспекцияси республикада кузатилаётган аномал иссиқ об-ҳаво муносабати билан барча ҳокимликларга ходимларнинг ҳаёти ва соғлиғини муҳофаза қилиш бўйича махсус кўрсатма юборди.

 

Маълум қилинишича, очиқ ҳавода юқори ҳарорат шароитида узоқ вақт ишлаш иссиқ уриши, организмнинг сувсизланиши, юрак-қон томир ҳамда асаб тизими фаолиятининг бузилиши каби оғир оқибатларга олиб келиши мумкин.

 

Ўзбекистон Меҳнат кодексининг 359-моддаси ҳамда амалдаги санитария қоидаларига мувофиқ, йилнинг иссиқ даврида очиқ ҳудудларда ҳаво ҳарорати 36°С ва ундан юқори бўлса, бу ўта хавфли (экстремал) меҳнат шароити ҳисобланади.

 

Шу муносабат билан Давлат меҳнат инспекцияси:

• 10:00–17:00 оралиғида очиқ ҳудудларда ҳашарлар, оммавий меҳнат тадбирлари ва бошқа жамоавий ишларни ташкил этмаслик;

• зарур ишларни имкон қадар соат 10:00 гача ёки 17:00 дан кейин бажариш;

• кечиктириб бўлмайдиган ишларда меҳнат ва дам олишнинг махсус режимини жорий этиш, иш вақтини қисқартириш ҳамда ходимларни ичимлик суви, сояли дам олиш жойлари, шахсий ҳимоя ва биринчи тиббий ёрдам воситалари билан таъминлашни талаб қилди.

 

Шунингдек, юқори ҳарорат шароитида ишлаётган ходимларнинг соғлиғи устидан доимий назорат ўрнатиш, аҳволи ёмонлашган тақдирда уларни дарҳол ишдан озод қилиш ва зарур тиббий ёрдам кўрсатиш лозимлиги таъкидланди.

 

Давлат меҳнат инспекцияси меҳнатни муҳофаза қилиш талабларини бузиш ҳамда ходимлар ҳаёти ва соғлиғига хавф туғдирувчи меҳнат шароитларини яратиш қонунчиликка мувофиқ жавобгарликка сабаб бўлишини эслатди.