АҚШ Эрон билан музокараларни давом эттиришга тайёр — Рубио
АҚШ Давлат котиби дипломатик уринишлар самара бермаса, бунинг оқибатлари Эрон учун оғир бўлиши мумкинлигини айтди.
АҚШ Давлат котиби Марко Рубио Вашингтон маъмурияти Эрон билан юзага келган зиддиятни дипломатик йўл билан ҳал қилиш тарафдори эканини маълум қилди. Бу ҳақда СNN хабар берди.
Унинг айтишича, АҚШ аввал ҳам Теҳрон билан музокаралар орқали келишувга эришишга уринган ва бу йўналишдаги саъй-ҳаракатларини давом эттиради.
“Қўшма Штатлар ҳар доим дипломатик ечимга тайёр. Биз бунга Эрон билан бир неча бор эришишга ҳаракат қилдик ва бундан кейин ҳам ҳаракат қиламиз. Агар музокаралар учун эшик очиқ бўлса, биз бунга тайёрмиз”, — деган Рубио.
Давлат котиби ҳар қандай келишув самимий бўлиши ва томонлар уни бажаришга тайёр бўлиши кераклигини таъкидлаган.
Шунингдек, Рубио дипломатик уринишлар натижа бермаса, бунинг оқибатлари Эрон учун салбий бўлиши мумкинлигини билдириб, мамлакат иқтисодиёти аллақачон жиддий босим остида эканини қайд этган.
Бундан ташқари, АҚШ Давлат котиби Эронни Ҳормуз бўғозидаги кемаларга ракета ва дронлар ёрдамида уюштирилган ҳужумлар учун танқид қилди.
