Фарғонада янги туғилган чақалоғини сотишга уринган эр-хотин 5 йилга қамалди
Айбланувчиларнинг сўзларига кўра, болани сотишдан тушадиган маблағ қарзларни ёпиш ва Туркияга ишлаш учун кетишга сарфланиши режалаштирилган эди.
Фарғона шаҳрида янги туғилган чақалоғини сотишга уринган эр-хотинга нисбатан суд ҳукми эълон қилинди.
Жиноят ишлари бўйича Фарғона шаҳар судида кўриб чиқилган иш материалларига кўра, айбланувчилар 2024 йил октабр ойида танишиб, никоҳни расмийлаштирмасдан бирга яшай бошлаган. 2025 йил октабр ойида эса уларнинг ўғил фарзанди дунёга келган.
Судда аёл чақалоқни сотишга молиявий қийинчиликлар сабаб рози бўлганини маълум қилган. Унинг сўзларига кўра, болани сотишдан тушадиган маблағ ўзининг қарзларини, турмуш ўртоғининг кредитларини ёпиш ҳамда Туркияга ишлаш учун бориш харажатларига сарфланиши режалаштирилган.
Шунингдек, аёл дастлаб болани сотишга рози бўлмаганини, бироқ таниши фарзанд "яхши шароитда тарбия топиши"ни айтгач, бу фикрга кўнганини билдирган. Судланувчининг айтишича, турмуш ўртоғи режа ҳақида фақат битим амалга ошириладиган куни хабардор бўлган. Шу сабаб улар ўртасида жанжал юзага келган, аммо кейинчалик эркак ҳам болани сотишга ёрдам беришга рози бўлган. Уларнинг режасига кўра, ушбу воқеадан сўнг ажрашиш ҳам кўзда тутилган.
Суд ҳукмига кўра, ҳар икки судланувчи Жиноят кодексининг 135-моддаси (одам савдоси) билан айбдор деб топилиб, 5 йил муддатга озодликдан маҳрум этилди.
Шунингдек, суд чақалоқнинг кейинги тақдирини ҳал этиш масаласини Ижтимоий ҳимоя миллий агентлиги ҳамда Қўқон шаҳри ҳокимлиги ҳузуридаги Болаларни ҳимоя қилиш бўлимига топширди.
