Месси ва Роналду билан бир ойга ўрин алмашишни истардим — Трамп
АҚШ президенти футбол афсоналари Месси ва Роналдунинг ҳаёти ўзиникидан анча осон эканини таъкидлади.
АҚШ президенти Доналд Трамп Аргентина терма жамоаси сардори Лионел Месси ҳамда Португалия терма жамоаси ҳужумчиси Криштиану Роналду ҳақида илиқ фикр билдириб, улар билан қисқа муддатга ўрин алмашишни исташини айтди.
Fox Sports нашрига берган интервьюсида Трамп ҳар икки футболчини буюк спортчилар сифатида эътироф этиб, ёшлигида афсонавий бразилиялик Пеле ўйинларини ҳам томоша қилганини эслаган.
“Месси ажойиб, Роналду ҳам ажойиб футболчи. Мен Пеленинг ҳам ўйинини кўриш бахтига муяссар бўлганман. Футболда буюк футболчилар жуда кўп”, — деган АҚШ президенти.
Трампнинг сўзларига кўра, у футбол оламига оид кўплаб маълумотларни ўғли Баррондан олади, чунки у футболнинг ашаддий мухлиси ҳисобланади.
Шунингдек, АҚШ президенти яқинда Лионел Месси билан учрашгани, Криштиану Роналдуни эса узоқ йиллардан буён танишини маълум қилган.
“Яқинда Месси билан учрашдим, Криштиануни эса анчадан бери биламан. Уларнинг ҳаёти жуда яхши. Очиғини айтсам, уларнинг ҳаёти меникидан анча осон. Ҳатто улар билан бир ойга ўрин алмашишни ҳам истардим”, — деди Трамп.
