Россиянинг бир неча ҳудудига дрон ҳужуми уюштирилди, саккиз киши ҳалок бўлди
Киев зарбалар ҳарбий логистика ва дрон ишлаб чиқариш билан боғлиқ объектларга қаратилганини билдирди.
Россиянинг бир неча ҳудудига тунда уюштирилган Украина дрон ҳужумлари оқибатида саккиз киши ҳалок бўлди, 60 нафардан ортиқ киши жароҳатланди. Россия расмийлари маълумотига кўра, ҳужумлар мамлакатнинг камида 19 ҳудудини қамраб олган бўлиб, энг катта талафот Тамбов вилоятида қайд этилган.
Тамбов вилоятининг Котовск шаҳрида Россиянинг йирик интернет-савдо компанияси Вилдберриес омборига дрон зарбаси берилган. Оқибатда тунги сменада ишлаётган етти нафар ходим ҳалок бўлди, яна 25 киши жароҳат олган. Москва вилоятининг Электростал шаҳридаги яна бир Вилдберриес логистика марказига ҳужум натижасида эса ўнлаб одамлар тан жароҳати олган.
Шунингдек, Москва вилоятининг Ногинск шаҳридаги нефть базасида дрон зарбаси ортидан ёнғин юзага келган. Хавфсизлик нуқтаи назаридан яқин атрофдаги туғруқхона эвакуация қилинган. Электросталда дрон қолдиқлари болалар боғчаси биносига ҳам зарар етказган.
Россия Мудофаа вазирлиги тунда 379 та Украина дрони уриб туширилганини маълум қилди. Вазирликка кўра, дронлар Россиянинг турли ҳудудлари, аннекция қилинган Қрим, шунингдек, Қора ва Азов денгизлари устида йўқ қилинган.
Украина президенти Володимир Зеленский ҳужумлар Россиянинг ҳарбий салоҳиятини таъминлаётган объектларга қаратилганини билдирган. Унинг сўзларига кўра, зарба берилган логистика марказларида дронлар ишлаб чиқаришда қўлланиладиган бутловчи қисмлар ва навигация ускуналари сақланган. Украина Қуролли кучлари, шунингдек, Россиянинг ёқилғи инфратузилмаси, Қора ва Азов денгизларидаги ҳарбий логистика объектлари ҳамда босиб олинган Луганск вилоятидаги муҳим темирйўл кўпригига ҳам зарбалар берилганини маълум қилди.
