Саудия Арабистони бир йиллик кўп марталик Умра визасини жорий этди
Виза эгалари мамлакатга бир неча бор кириб, умумий ҳисобда 90 кунгача қолиши мумкин.
Саудия Арабистони Ҳаж ва Умра вазирлиги зиёратчилар учун бир йиллик кўп марталик Умра визасини жорий этди.
Янги тартибга кўра, мазкур виза берилган кундан бошлаб 365 кун давомида амал қилади ва унинг эгаларига Саудия Арабистонига бир неча бор кириш ҳамда умумий ҳисобда 90 кунгача мамлакатда бўлиш имконини беради.
Саудия матбуот агентлиги (SPА) маълум қилишича, ушбу ташаббус "Saudi Vision 2030" дастури ва Зиёратчилар тажрибаси дастури мақсадларини қўллаб-қувватлашга қаратилган бўлиб, зиёратчилар учун қулайликларни ошириш, хизматлар сифатини яхшилаш ҳамда рақамли хизматларни кенгайтиришни назарда тутади.
Янги тартибга мувофиқ, ҳар бир ташриф олдидан зиёратчилар Nusuk платформаси орқали тасдиқланган хизмат кўрсатувчи ташкилотдан хизмат пакетини харид қилиши ва Nusuk иловаси орқали Умра рухсатномасини олиши шарт.
Шунингдек, виза ҳар сафар мамлакатни тарк этгандан сўнг вақтинча бекор қилинади ва кейинги ташриф учун белгиланган талаблар бажарилгач қайта фаоллаштирилади.
Мазкур виза Ҳаж мавсумида — Зулқаъда ойининг биринчи кунидан Зулҳижжа ойининг 13-кунигача амал қилмайди.
Вазирликнинг таъкидлашича, янги тизим Умра сафарларини режалаштиришда янада кўпроқ мослашувчанлик яратиш ҳамда зиёратчилар учун хизматлар самарадорлигини оширишга хизмат қилади.
