Украина Қозоғистон нефти ортилган танкерларга ҳужум қилди

 

Қора денгизда Қозоғистон нефти юкланган ASIA ва NISSOS IOS номли икки танкер Украина дронлари ҳужумига учради. Ҳодиса Каспий қувур линияси консорциуми (СПС) терминалида нефть юклаш жараёнида содир бўлган.

 

Қозоғистон Энергетика вазирлиги маълум қилишича, ҳужум оқибатида танкерларда ёнғин юзага келган, бироқ экипажлар уни қисқа вақт ичида бартараф этган. Ҳодисада жабрланганлар қайд этилмаган, порт инфратузилмасига жиддий зарар етмаган ва нефть сизиб чиқишига йўл қўйилмаган.

 

Вазирлик билдиришича, ҳодиса оқибатлари тўлиқ баҳоланмагунча терминалда нефть юклаш ишлари вақтинча тўхтатилган.

 

Қозоғистон Энергетика вазирлиги халқаро энергетика инфратузилмасининг фуқаролик объектларига қилинган бундай ҳужумларни мутлақо қабул қилиб бўлмас ҳолат деб баҳолаб, бу глобал энергетика хавфсизлиги ва халқаро савдо барқарорлигига таҳдид солишини таъкидлаган.

 

Қозоғистон Ташқи ишлар вазирлиги ҳам нефть ташиётган танкерларга 17 ва 19 июль кунлари уюштирилган ҳужумларни кескин қоралаб, уларни мамлакатнинг иқтисодий манфаатлари ҳамда халқаро транспорт-логистика занжирларига қарши қаратилган ҳаракат сифатида баҳолаган.

 

Маълум қилинишича, бу Қозоғистон нефти ортилган танкерларга уюштирилган илк ҳужум эмас. Аввалроқ, 18 июль куни Нордис Зенитҳ танкерига, жорий йилнинг 13 январида эса Каспий қувур линияси консорциуми терминалига йўл олган яна учта танкерга дронлар ҳужум қилган эди.