ЖЧ-2026 ўйинларига 6,8 млн томошабин ташриф буюрди
Шимолий Америкада ўтказилган 2026 йилги футбол бўйича жаҳон чемпионати тарихдаги энг кўп томошабин йиғган турнирга айланди.
FIFА маълумотларига кўра, АҚШ, Канада ва Мексика мезбонлик қилган 2026 йилги футбол бўйича жаҳон чемпионатини стадионлардан 6,8 миллиондан ортиқ мухлис томоша қилган. Шу тариқа мусобақа FIFА жаҳон чемпионатлари тарихидаги энг юқори ташриф кўрсаткичи қайд этилган турнирга айланган.
Бу натижа 1994 йилда АҚШ мезбонлик қилган жаҳон чемпионатида ўрнатилган аввалги рекордни сезиларли даражада ортда қолдирди. 2026 йилги мусобақада илк бор 48 та терма жамоа иштирок этгани ва уч давлат мезбонлик қилгани стадионларга ташриф буюрган мухлислар сонининг кескин ошишига хизмат қилган.
Турнир давомида ўйинларга ўртача 65 мингдан ортиқ мухлис ташриф буюрган. FIFА, шунингдек, расмий фан-фестиваллар, рақамли платформалар ва трансляциялар орқали ҳам рекорд даражадаги аудитория қамраб олинганини маълум қилган.
2026 йилги жаҳон чемпионати 104 та учрашувдан иборат бўлиб, тарихдаги энг йирик мундиал сифатида ўтказилди. Мусобақа нафақат томошабинлар сони, балки иштирокчи жамоалар, ўйинлар сони ва тижорий кўрсаткичлар бўйича ҳам бир қатор рекордларни янгилади.
