Жиззахда шахсий фото ва видеоларни тарқатиш билан таҳдид қилиб пул талаб қилган шахс ушланди
У маҳалладошини шахсий тасвирларини тарқатиш билан қўрқитиб, 1,5 млн сўм талаб қилган.
Жиззах вилоятида фуқаронинг шахсий фото ва видеотасвирларини ижтимоий тармоқларда тарқатиш билан таҳдид қилиб, пул талаб қилган шахс процессуал тартибда ушланди. Бу ҳақда вилоят Ички ишлар бошқармаси маълум қилди.
Қайд этилишича, “Хавфсиз ва соғлом юрт” ойлиги доирасида Пахтакор туманида ўтказилган тезкор тадбир давомида товламачилик жиноятини содир этганликда гумон қилинаётган шахс қўлга олинган.
Дастлабки маълумотларга кўра, 1993 йилда туғилган Г.М. 1996 йилда туғилган маҳалладоши Б.Я.нинг шахсий фото ва видеотасвирларини ижтимоий тармоқларда тарқатиш билан қўрқитиб, ундан 1 миллион 500 минг сўм талаб қилган.
Гумонланувчи талаб қилинган пул маблағини олаётган вақтда ички ишлар органлари ходимлари томонидан ушланди.
Ҳозирда мазкур ҳолат юзасидан тергов ҳаракатлари олиб борилмоқда.
