17 нафар ҳокимнинг лавозимига лойиқлиги бугуноқ кўриб чиқилади
Саноат ва экспорт режалари бажарилмаган ҳудудлар танқид қилиниб, масъулларга қатъий огоҳлантириш берилди.
Президент Шавкат Мирзиёев раислигида ўтказилган видеоселектор йиғилишида жорий йилнинг олти ойлик якунлари бўйича саноат ва экспорт кўрсаткичлари танқидий таҳлил қилинди.
Қайд этилишича, биринчи чорак якунида саноат режасини бажармаган 13 нафар ҳамда экспорт ҳажмини камайтирган 15 нафар туман ҳокимига нисбатан интизомий чоралар кўрилган. Ушбу огоҳлантиришлардан сўнг кўплаб ҳудудлар раҳбарлари тегишли хулосалар чиқариб, олти ойлик прогноз кўрсаткичларини таъминлаган.
Шу билан бирга, айрим туман ва шаҳарларда саноат ўсиш суръатлари сезиларли даражада пасайгани қайд этилди. Жумладан, Янгиобод туманида саноат ўсиши режалаштирилган 5,7 фоиз ўрнига атиги 1,8 фоизни ташкил этган. Шунингдек, Ғозғон шаҳри, Музработ, Қизириқ ва Олтиариқ туманларида ҳам саноат ривожланиши суст кечаётгани танқид қилинди.
Экспорт йўналишида ҳам қатор ҳудудларда кутилган натижалар таъминланмагани таъкидланди. Хусусан, Касби, Денов, Тошкент тумани, Жиззах шаҳри, Пахтаобод, Навоий шаҳри, Жомбой, Тойлоқ, Бандихон, Мирзачўл, Ёзёвон ва Бектемир туман ҳамда шаҳарларида экспорт кўрсаткичлари бўйича ишлар суст олиб борилаётгани қайд этилди.
Йиғилишда Бош вазирга саноат ва экспорт йўналишларида суст натижа кўрсатган 17 нафар ҳокимнинг лавозимига лойиқлигини бугуннинг ўзида кўриб чиқиш топширилди.
Шунингдек, тўққиз ой якунига қадар ушбу ҳудудларда вазият ижобий томонга ўзгармаса, вилоят ҳокимларининг иқтисодиёт бўйича ўринбосарларига нисбатан ҳам қатъий чоралар кўрилиши белгиланди.
