Афғонистондаги сув тошқинлари оқибатида 20 киши ҳалок бўлди

 

Афғонистоннинг шимоли-шарқидаги Нуристон вилоятида юз берган кучли ёмғирлар оқибатида содир бўлган сув тошқинлари камида 20 кишининг ҳаётига зомин бўлди. Бу ҳақда мамлакатнинг Табиий офатларни бошқариш миллий бошқармаси маълум қилди.

 

Дастлабки маълумотларга кўра, табиий офат оқибатида 80 киши жароҳатланган, 100 дан ортиқ фуқаро бедарак йўқолгани тахмин қилинмоқда. Расмийлар қидирув-қутқарув ишлари давом этаётгани сабабли қурбонлар сони яна ортиши мумкинлигини билдирган.

 

Энг катта талафот Нуристон вилоятининг Парун шаҳрида кузатилган. Покистон билан чегарадош ҳудудда қидирув-қутқарув операцияси давом этмоқда.

 

Афғонистон Транспорт ва фуқаро авиацияси вазирлиги ҳузуридаги Метеорология бошқармаси яқин кунларда ҳам бир қатор вилоятларда кучли ёмғир, момақалдироқ ва чанг бўронлари кузатилиши, бунинг оқибатида янги сув тошқинлари юзага келиши мумкинлигидан огоҳлантирган.

 

Расмийлар аҳолини дарё бўйлари ва сув тошқини хавфи юқори бўлган ҳудудлардан узоқроқ туришга, фавқулодда вазиятлар бўйича масъул идоралар кўрсатмаларига қатъий амал қилишга чақирган.

 

Мутахассислар табиий офатлар сонининг ортишини иқлим ўзгариши ҳамда йиллар давомида ўрмонларнинг кесилиши натижасида тупроқнинг сувни шимиш қобилияти пасайгани билан изоҳламоқда.