Беларусдаги Ўзбекистон элчиси лавозимидан озод этилди
Шунингдек, Шавкат Мирзиёев қатор давлатлардаги элчилар фаолияти танқид қилди.
Президент Шавкат Мирзиёев раислигида ўтказилган видеоселектор йиғилишида инвестиция лойиҳалари ижроси ҳамда хориждаги дипломатик ваколатхоналар фаолияти танқидий таҳлил қилинди.
Қайд этилишича, сўнгги йилларда олий даражадаги 52 та хорижий ташриф доирасида умумий қиймати 213 миллиард долларлик 1 617 та инвестиция лойиҳаси бўйича келишувларга эришилган. Бироқ ушбу лойиҳаларнинг амалга оширилиши устидан назорат етарли даражада ташкил этилмагани кўрсатиб ўтилди.
Шу муносабат билан эндиликда инвестиция лойиҳалари бўйича ишлаб чиқилган “йўл хариталари” Ҳисоб палатаси ва Ташқи ишлар вазирлиги томонидан юритилиши белгиланди.
Бош вазирга ҳар ҳафта тармоқ раҳбарлари, ҳудудлар ҳокимлари ва элчилар иштирокида давлатлар кесимида ҳамда ҳар бир лойиҳа бўйича алоҳида муҳокамалар ўтказиш топширилди.
Йиғилишда хориждаги дипломатик ваколатхоналар фаолияти юзасидан ҳам қатор эътирозлар билдирилди. Хусусан, Беларусдаги Ўзбекистон элчиси инвестиция ва ташқи савдо масалаларига лоқайд ёндашгани сабаб лавозимидан озод этилгани маълум қилинди.
Шунингдек, Франция, Австрия, Испания, Италия, Ўмон, Индонезия, Малайзия ва Cингапурдаги элчиларнинг фаолияти ҳам етарли даражада натижа бермаётгани қайд этилди.
Президент Администрацияси раҳбари Саида Мирзиёевага иқтисодий дипломатия, инвестиция ва экспорт йўналишлари бўйича дипломатик ваколатхоналар фаолиятини комплекс таҳлил қилиш, ўз вазифасини самарали бажармаётган раҳбарларни замонавий фикрлайдиган ва ташаббускор ёш кадрлар билан алмаштириш юзасидан таклифлар тайёрлаш вазифаси юклатилди.
