Бухоро вилояти ҳокими ўринбосари лавозимидан озод этилди
Президент солиқ тушумларини ошириш бўйича суст ишлаётган ҳудудлар фаолиятини танқид қилди.
Президент Шавкат Мирзиёев раислигида ўтказилган видеоселектор йиғилишида солиқ тушумлари бўйича мавжуд имкониятлардан тўлиқ фойдаланилмаётгани танқид қилинди.
Қайд этилишича, йил бошидан буён республикада солиқ тушумлари 27 фоизга ошиб, 130 триллион сўмдан ортиқни ташкил этган. Бироқ қўшимча тушумлар бўйича белгиланган йиллик режанинг атиги 40 фоизи бажарилиб, бу 12 триллион сўм миқдорида бўлган.
Йиғилишда вилоят ҳокимларининг биринчи ўринбосарлари корхоналар билан солиқ тушумларини ошириш юзасидан етарли даражада ишламаётгани танқид қилинди.
Мисол тариқасида, Бухоро вилоятида йиллик айланмаси 100 миллион сўмдан юқори бўлган 162 та корхона кетма-кет уч йил фаолиятини зарар билан якунлагани сабабли бир сўм ҳам фойда солиғи тўламагани қайд этилди.
Шунингдек, 1,5 мингта корхона қўшилган қиймат солиғини (ҚҚС) тўламасдан, фақат ҚҚСни чегириб келаётгани аниқланган.
Йўл қўйилган камчиликлар сабабли Бухоро вилояти ҳокимининг биринчи ўринбосари лавозимидан озод этилди.
Йиғилишда 2026 йил 1 июлдан бошлаб 498 та йирик солиқ тўловчи корхонадан солиқ ундириш ваколати ҳудудларга ўтказилгани эслатилиб, эндиликда натижа учун бевосита ҳудудлар масъул экани таъкидланди.
Шу муносабат билан вилоят ҳокимларининг биринчи ўринбосарлари ҳамда ҳудудий солиқ органлари раҳбарларига мазкур корхоналар билан тизимли ишлаш, солиқларнинг тўлиқ ва ўз вақтида ундирилишини таъминлаш бўйича аниқ топшириқлар берилди.
